Аргентина загуби од Бразил во мечот за квалификациите за Светското фудбалско првенство во Русија и ја закомпликува својата положба на табелата. Аргентина нема игра, нема атмосфера и нема да биде изненадување доколку не избори пласман на Мундијалот.
Аргентина на последниот Мундијал, чии домаќин беше Бразил, играше во финалето, а две години подоцна токму на бразилска почва максимално си ја закомпликува положбата на табелата.
Од Јужна Америка четири селекции ќе изборат директен пласман на Мундијалот, а петтопласираната ќе игра бараж. Во овој момент, на седум кола до крајот на квалификациите, Аргентина е на бод од петтото место, односно на два бода од позицијата четири.
Но игрите на „гаучосите“ не влеваат надеж дека тие можат нешто драстично да сменат. Забележливо беше тоа и на пресметката во Бразил која домаќинот лесно ја реши во своја корист.
„Shit. Така играме и таква е ситуацијата во која се наоѓаме. Проблемот е во нашите глави и таму мора да го решиме, бидејќи кога не играме на вистинскиот начин тогаш и нозете не не слушаат“, изјавил најдобриот аргентински играч Лионел Меси, кој објаснил како Бразил победил.
„Не ликвидираа со вториот гол, потоа целосно бевме разбиени, разоружани, загубени на теренот“, додал.
Аргентина за пет дена ја очекува уште еден тежок меч, ќе ѝ биде домаќин на Колумбија, која не блеска во квалификациите но има два бода повеќе од Аргентинците.
„Мораме да подобриме буквално сé во нашата игра. Се надевам дека навивачите ќе имаат трпение против Колумбија, бидејќи свирежите нема да ни помогнат. Мораме да се сплотиме, навивачите мора да разберат дека заедно мора да го минеме овој тежок период“, завршил Меси.
Лионел Меси кој блеска во Барселона, со националниот тим загуби три финалиња во низа, две на Копа Америка од Чиле и едно на Мундијалот од Германија.
