Иако Европската комисија уште пред три години предложи да се укине сезонското поместување на часовникот, државните членки не се договорија, а се чини дека во догледно време тоа нема ни да се случи.
„Во недела, 31. октомври ќе го поместиме часовникот“, изјави неодамна портпаролот на Европската комисија Стефан де Керсмекер, одговарајќи на прашање на новинар за предлогот да се укине поместувањето на часовникот последната недела во март и последната недела во октомври.
Поместувањето на часовникот требаше да престане во 2019. година, откако тоа го предложи претседателот на комисијата Жан Клод Јункер во 2018. година, со тоа што на членките им беше препуштено да одлучат дали ќе го задржат летното или зимското сметање на времето.
Одлуката за тоа дали некоја држава членка ќе го земе како трајно летното или зимското сметање на времето зависи од нејзината географска положба и поради тоа е тешко да се очекува одговор од Комисијата.
Во Европската унија постојат три временски зони и најголема е средноевропската од Полска на исток до Шпанија на запад. Кога сите земји од таа временска зона би го земале на пример летното сметање на времето, во Шпанија, Белгија, Холандија, Данска, во зима сонцето би излегувало дури во средина на попладневните часови, а северозападно од Шпанија во 10 часот.
Од друга страна, кога земјите на западот и северот од континентот би влегле во западноевропска временска зона, што би било природно, би настанале нови компликации бидејќи Франција и Германија би припаѓале на две различни временски зони.
Поради тоа се чини дека сезонското поместување на часовникот, покрај сите недостатоци, сепак е најдобар компромис.
