Мајка ги повикува родителите да престанат да ги користат телефоните кога се со своите деца, зашто „висејќи“ на социјалните мрежи не само што пропуштаат скапоцени моменти, туку и им пренесуваат порака дека животот онлајн е поважен од реалниот.
Бренди Вуд решила да спроведе мал „експеримент“ додека нејзините 2-годишни близначиња си играле. Наместо да искористи прилика да провери што има ново на интернет, таа посветено ја набљудувала играта на синчињата Блејн и Рајли и запишувала колку пати ќе погледнат во неа, барајќи внимание или одобрување/ неодобрување.
Верувале или не, малите дечиња го свртиле погледот кон Бренда 28 пати во текот на играта, што ја поттикнало да го напише следниов текст на својот профил на Facebook:
Денес направив експеримент, ги гледав моите деца како си играат. Додека седев тивко во аголот од собата, запишував колкупати ќе погледнат во мене поради различни причини: за да проверат дали сум ги видела како прават кул трикови, за да побараат одобрување или неодобрување за нивните постапки и за да ги видат моите реакции. Не можев, а да не се запрашам себеси каква порака им испраќам кога седам на некој гаџет?
28 пати моите ангели ќе се запрашаа дали интернетот ми е поважен од нив.
28 пати моите момчиња немаше да го добијат вниманието кое им е потребно.
28 пати моите сакани ќе се прашуваа дали добиваат емоционална поддршка.
28 пати моите деца ќе се увереја дека е навистина важно каков си онлајн.
Во свет каде сме прифаќани според начинот на кој нè гледаат луѓето, а не според она што сме… Во свет каде сме ценети по тоа колку следбеници или лајкови имаме… Во свет каде квалитетното време со саканите е заменето со изолација и СМС пораки од другата соба, ве замолувам да бидете поразлични.
Ве молам, оставете ја технологијата настрана и поминете време со вашето семејство и со саканите.Следната генерација деца смета на нас за да ги научиме како да бидат возрасни. Престанете да се занимавате со социјалните мрежи, не можете ни да претпоставите кој ве гледа и каква порака му испраќате.
Текстот на Вуд брзо се проширил на социјалните мрежи и досега е споделуван 80.000 пати.
Во интервју за The Huffington Post таа рекла: „Мислам дека технологијата треба да биде ограничена, да се пронајде здрав баланс. Таа е нож со две острици. Може да помогне и да уназади. И јас сум виновна што постојано сум на мојот телефон, но ова искуство ме поттикна да бидам поприсутна“.
