Македонската филхармонија, на 2 октомври, ќе гостува во Центарот за култура во Битола, на свеченото отворање на 27-то издание на Интернационалниот фестивал за класична музика „Интерфест-Битола“.
Филхармонијата ќе се претстави со симфониски концерт, на кој како солист ќе настапи истакнатата виолинистка Ајман Мусакаџајева од Казахстан, која ќе го изведе атрактивниот Концерт за виолина од Арам Хачатуријан. Диригент е маестро Борјан Цанев, а оваа вечер ќе биде изведена и „Фантастична симфонија“ од Хектор Берлиоз, една од најпопуларните творби на францускиот композитор.
