Откако стана првиот атлетичар во историјата кој успеал да освои злато на три последователни Олимписки игри во спринт на 100 метри, Јусеин Болт го направи истото и на двојно подолгата патека, со што постави два хет-трика за само неколку дена.
Болт доминираше над својата конкуренција и во финалето на 200 метри, во кое не се пласираше дури ни неговиот најголем ривал Џастин Гетлин од САД.
Меѓутоа, и кога е Гетлин тука и кога не е, Болт се трка сам со себе – 19,78 секунди на водена патека.
Но, кога заврши трката, Болт не реагираше како што е вообичаено за него – со насмевка. Овој пат тој луто го тргна стартниот број од опремата и го фрли на патеката, а што значеше тоа е тешко да се каже без дополнителни информации.
Можеби најбрзиот човек на сите времиња е лут што со години нема вистинска конкуренција и што во најголемите натпреварувања се бори против сопствените рекорди.
Меѓутоа, само неколку секунди потоа, публиката повторно ја виде неговата препознатлива насмевка, а кога организаторите го пуштија славниот хит “Reggae night” Болт заигра со своите фанови на трибините.
