Со своите уникатни звуци Thievery Corporation ја разиграа македонската публика и на одличен начин го означија стартот на летниот фестивал Skopje Calling.
Оваа година е второто издание на Skopje Calling, во организација на Авалон, со намера да стане традиционален фестивал кој ќе носи квалитетни и познати имиња од музичкиот свет. Како датум за отворање на овогодинешниот музички фестивал беше закажан 20-ти јуни, а отвореното небо и совршената вечер на стадионот на АРМ го направи доживувањето комплетно.
Фестивалот го отворија Thievery Corporation, а како ѕвезда на следната фестивалска вечер која ќе се одржи на 23-ти јуни ни доаѓа Martin Garrix.
Со своите реге и танц звуци, го претставија нивниот последен албум The Temple of I and I, што беше вистинско уживање за бројната публика која еуфорично играше на нивните звуци.
Музиката испреплетена со различни стилови од реге, источна, хип – хоп, електронска, бразилска…донесе вистинско освежување на музичката понуда кај нас, а и направи среќни многу фанови на Thievery Corporation.
Македонија ја имаше честа да биде дел од европската турнеја на овие 20 музичари кои го сочинуваат овој феноменалниот американски бенд, предводен од Eric Hilton и Rob Garza, кои умеат да направат вистинско уживање и со нивните звуци и енергија да ве одведат во некои други простори каде може само да пеете, да танцувате и да уживате.
Уникатноста на Thievery Corporation како музички колектив произлегува од нивниот спој од разни светски музичари кои ја обединуваат светската традиција на еден истакнато современ начин.
Меѓу 20-те музичари на сцена, на бас свити харизматичниот Ashish Vyas, на гитара и ситар свири виртуозниот Rob Myers, додека на перкусии, пак, Frank Orall и Jeffrey Franca.
Звучниот инженеринг, програмирање, ритмичките и хармонските делници во живо ги носи продуцентот на бендот и водечкиот авторски двоец Eric Hilton и Rob Garza.
