„Дени Интернационал“ започна изградба на нов модерен логистички центар во економската зона Илинден, во близина на Скопје. Тоа ќе биде инвестиција од 4.5 милиони евра, која ќе обезбеди 80-90 нови работни места.
Објектот ќе се гради на површина од 70000 квадратни метри земјиште, од кои 12000 ќе бидат магацински простор, 1000 административен дел и канцеларии и сместувачки капацитет за околу 400 товарни и други комерцијални возила. Центарот се очекува да биде готов за една година.
Заменик извршниот директор Дејан Јакимовски потенцира дека „Дени Интернационал“ ќе остане, како и досега, лидет во транспортно-логистичките услуги во државата.
На отварањето присуствуваше и премиерот Оливер Спасовски, кој кажа:
„Во овие сложени услови за деловно работење предизвикани од Ковид-19, сопственикот и менаџментот на „Дени Интернационал“ не се откажаа од реализацијата на стратешките цели на компанијата насочени кон континуиран раст и развој на организацијата, проширување на дејноста, зголемување на профитот, меѓутоа не се откажаа ниту од раст на економијата во сопствената земја“.
На отварањето се обрати и градоначалникот на Општина Илинден, Жика Стојановски, кој упати честитки на компанијата и нагласи дека оваа семејна фирма е општествено одговорна компанија.
