Вардар со победничка серија влегува во осминафиналето од Лигата на шампионите. Во последниот натпревар од групната фаза во Лигата на шампионите „црвено-црните“ на домашен терен славеа против Монпелје со 34-26 и ја запишаа третата победа во серија во последните три натпревари во групата Б.
Со двата бода од овој дуел, Вардар со вкупно 18 бода засега е на третото место на табелата и ќе остане на оваа позиција доколку Рајн Некар Левен вечерва загуби од Барселона на гостувањето во „Блауграна“. Доколку пак Борко Ристовски и „лавовите“ направат изненадување во Шпанија, тогаш вардраци се враќаат на четвртото место и од оваа позиција ќе стартуваат во Топ 16.
Разврската ќе биде позната за неколку часа, а тогаш ќе биде познато и кој ќе биде следниот противник на Вардар на патот кон четвртфиналето – Висла Плоцк или ППД Загреб.
