За да бидеш прв, најдобар и покрај големата конкуренција воопшто не е едноставно. Потребен е огромен труд, напор и вложување во себе. Најдобриот македонски кик-боксер Димитар Ѓорѓиев кој зад себе има три титули светски шампион го знае тоа.
Изминатата година уште еднаш ја потврди својата класа и во меѓународни рамки освојувајќи ја шампионската титула на Европското првенство за сениори кое се одржува во Братислава, Словачка. Покрај многубројните успеси тој е сопственик на КБК Работнички Адора каде што покрај активностите во кик бокс за професионалци и рекреативци, ви нуди можност да тренирате Функционален Фитнес и Burn it up.
1. Кој е Димитар приватно, настрана од спортските активности и љубовта кон кик боксот?
Студирам на Правниот факултет, се надевам дека набргу ќе се реализирам и на ова поле. Покрај кик боксот, слободното време кое што ми останува се трудам секогаш да го посветам на моето семејство уживајќи во заедничките моменти, искуства и случки.
2. Како започна да се занимаваш со овој спорт и раскажи ни нешто повеќе за досегашните успеси?
Со кик боксот се запознав сосема случајно, вежбав рекреативно и едноставно сакав да видам колкав е мојот капацитет и колку можам да постигнам. Мојата прва борба помина одлично, што ми даде голем мотив за понатамошни успеси. Оттогаш кик боксот прерасна во моја пасија, начин на живот, а тоа е причината поради која сѐ уште се занимавам со овој спорт.
View this post on Instagram
3. Од Европското кик бокс првенство за сениори во Братислава, Словачка, се врати со златен медал достигнувајќи го врвот во ова првенство. Колку време се подготвуваше и колку дисциплина, откажување и самоконтрола се потребни за да се достигне врвот?
Подготвувањето не беше едноставно, особено затоа што во исто време ја подготвував салата КБК Работнички Адора и се подготвував за борба, што од оваа перспектива можам да кажам дека за мене беше еден од најнапорните периоди во животот. Откако пристигнав на првенството, само се измерив на вага и првите три денови додека почнаа борбите буквално не излегов од соба… Овој медал се обидував да го освојам 7 години и морам да напоменам дека ми е премногу драг, а следната година ќе дадам сѐ од себе да го задржам.
4. Среќата е една од најважните емоции кај секој човек. Што те прави тебе среќен?
Како поминуваат годините, сѐ повеќе сфаќам дека најголема среќа е кога сум со моето семејство и најблиските луѓе. Времето поминато со нив е непроценливо.
View this post on Instagram
5. Која е твојата порака до сите млади луѓе кои го сакаат спортот и се грижат за својата кондиција. Зошто кик боксот е вистински избор?
Спортувањето пред сѐ е секогаш вистински избор. Конкретно кик боксот би го препорачал на сите оние кои сакаат возбуда при спортувањето, динамика, а истовремено да потрошат многу калории и негативната енергија која се акумулира во секој од нас.
