Сигурно сте слушнале и добри, но и лоши работи од дарувањето крв. Само дел од приказните се – драстично зголемување на телесната тежина, нагони за повраќање и чувство на гадење, болка при убод од игла, можност за инфекција и слично, но една и единствена е вистината – СЕТО ОВА Е САМО МИТ.
Дарувањето крв е доброволен, бесплатен и хуман чин кој е пожелно да го прави секој физички здрав човек. Дали знаевте дека е потребно 3-5% од населението да донира крв за да им се помогне на болните и повредените?
Ви претставуваме само дел од бенефициите кои несомнително ќе ги добиете при секоја процедура на крводарителство.
1. Правите подобар контакт со луѓето во заедницата и станувате личност која сите ја препознаваат и почитуваат.
2. Се регенерираат крвните зрнца.
3. Си осигурувате доволно крв за себе и за своите блиски
4. Дарувањето крв не е болно, не создава навика и не му штети на организмот.
5. При секое дарување крв, добивате бесплатен лекарски преглед и можност да ја проверувате својата здравствена состојба – крвниот притисок, пулсот и хемоглобинот секогаш кога ќе дарувате крв.
6. Им нудите помош на пациентите со карцином, кардиоваскуларни болести, пациенти со изгореници, жртви на сообраќајни несреќи, при операции, пациенти со хемофилија, при породување и многу други.
7. На крводарителите им се доделуваат признанија за секое 5, 10, 25, 50 и повеќе дарувања крв.
8. На овој начин можете да станете дел од волонтерите на Црвениот крст.
9. Од вашата крв можат да бидат направени дополнителни 3-4 нови единици крв.
10. Најважно од се е непроценливото чувство на задоволство и среќа дека сте придонеле за спасување на најмалку еден човечки живот.
