Во склоп на проектот „Европската недела на спортот“ кој веќе е во тек, исполнувајќи ги зацртаните активности, денес започна најавениот настан во ПОУ „Д-р. Златан Сремец“, училиште за деца од прво до деветто одделение со попреченост.
На иницијатива на АСПЕКТ и Волонтерски центар, Скопје, со поддршка од Црвен Крст и Агенцијата за млади и спорт, големиот број на волонтери кои присуствуваа помогнаа во чистењето на дворот кој во иднина ќе биде омилено спортско детско катче на учениците од ПОУ „Д-р. Златан Сремец“. Ова е само почеток на предвидената акција во ова училиште, каде што во иднина ќе започне обновата на кафезите, а воедно еден од нив е и катче за спорт.
Сите деца заслужуваат еднаква љубов и внимание, а во светот на различности, каде што секојдневно се бориме за еднаквоста во секоја сфера, целта на овој проект е да се овозможи еднаков третман и услови за учениците со попреченост, преку безбеден и соодветен простор за спортски и рекреативни активности. За остварувањето на овој настан голем придонес дадоа приватните компании: Жито, Жикол, Голден Арт и Гудмарк Груп.
„Европската недела на спортот“ во Република Македонија на локално ниво овозможува квалитетни активности кои создаваат вредност и одржливи резултати кои ќе ја продолжат #BeActive пораката во земјата – спортот и физичката активност претставуваат национален проект, со што доделувањето на кофинансирање од Европската Комисија во Програмата придонесува за развој на спортот во смисла на активно вклучување на граѓаните, индивидуално и институционално унапредување и промовирање на стилови за водење грижа на здрав живот на секој поединец.
